Foto Xanana, Mauhunu-Mauhudu Infeita Kampaña CNRT

Baucau  MLP: Iha kampaña Partidu Kongresu Nasional Rekonstrusaun Timor (CNRT) hatudu, iha fotográfia lider rejisténsia nain tolu (Xanana, Mauhunu no Mauhudu) maka infeita kampaña CNRT iha dokumentu sira` prioridade, hodi hatudu katak, iha funu laran, sira (Mauhunu, Mauhudu no Xanana) la’os hanoin deit tiru malu, maibe hanoin ona povu nia moris diak ba futuru.

Kay Rala Xanana Gusmão ko’alia ida ne’e, iha kampaña ne’ebé halao iha Quelicai, Distritu Baucau, Kuarta-Feira (07/6) no mos antes ne’e ko’alia ba militante no simpatizante sira CNRT iha Distritu Lautem iha primeiru dia kampaña ne’e hahú, Tersa-Feira (5/6).

“Ohin ita hasoru malu iha ne’e, atu ko’alia konaba loron aban nian,”afirma Kay Rala Xanana Gusmão ba militante no simpatizante sira Partidu CNRT.

Kay Rala Xanana Gusmão ko’alia, iha dokumentu sira ne’ebé fahe ho programa prioridade partidu nian, iha laran iha foto Mauhunu, Mauhudu no nia (Xanana). “Iha foto ne’e sei fo hatudu no fo lembra ba hotu-hotu katak, iha ailaran ami buka hanoin konaba funu, hanoin konaba prosesu no hanoin konaba oin nusa maka halo mudansa ba manan funu, funu iha ailaran laos deit tiru malu, subar an, maibe funu ailaran ejiji ami atu hanoin, ohin 2012, nudar maun boot, nudar komandante, hau hare ba Timor tomak husi Tutuala to’o Oecusse, husi Tasi Feto to’o Tasi Mane,”hateten Kay Rala Xanana Gusmão.

Foto Mauhunu, Mauhudu no Xanana ne’e atu lembra katak, sira nain tolu, agora matebian Mauhudu iha hela leten hare hela mai hotu-hotu katak, sira nain rua (Mauhunu no Xanana) mai husi partidu ida, aprende politika iha partidu ida, defende bandeira partidu ida ne’e nian mos.

“Hau sai husi Fretilin, hau kaer forsas, hodi hamutuk lori funu ba manan, ida ne’e maka dehan katak, ita nia prosesu bainhira ejiji atu ita hasai desizaun, ita tenki hasai, ba ita nia objektivu nia interese, laos ema duni hau, laos tanba hau la gosta, maibe presisa sai duni i halo desizaun sai,”Xanana konta tuir.

Notisia - Notisia CNRT